രഘുവീർ സഹായ് (1929-1990)

---

1. ദൈവകൃപ

---

ഒരു പൂച്ചയതാ വഴി മുറിച്ചു പോകുന്നു.
സുന്ദരികളായ സ്ത്രീകൾ
അതുമിതും പറഞ്ഞിരിക്കുന്നു.
നിലാവു വീഴുന്ന മൈതാനത്ത്
കാലികൾ മേഞ്ഞുനടക്കുന്നു.

ഇവയൊന്നും തമ്മിലന്യോന്യബന്ധമില്ലാത്ത-
തങ്ങയുടെ കൃപയല്ലെങ്കിൽപ്പിന്നെന്താണു ദൈവമേ?

---

2. ഇന്നു വീണ്ടും

---

ഇന്നു വീണ്ടും ജീവിതത്തിനു തുടക്കമായി.
ഇന്നു ഞാൻ ചെറുതും സരളവുമായൊരു കവിത വായിച്ചു;
ഇന്നു ഞാനേറെനേരം സൂര്യാസ്തമയം കണ്ടിരുന്നു;
ഇന്നു ഞാൻ മതി വരുവോളം തണുത്ത വെള്ളത്തിൽ കുളിച്ചു;
ഇന്നൊരു കൊച്ചുപെൺകുട്ടി കിലുങ്ങിച്ചിരിച്ചും കൊണ്ടെന്റെ തോളത്തു ചാടിക്കയറി;
ഇന്നൊരു പാട്ടു ഞാൻ തുടക്കം തൊട്ടൊടുക്കം വരെ പാടിത്തീർത്തു.
ഇന്നു വീണ്ടുമെനിക്കു ജീവിതത്തിനു തുടക്കമായി.

---

3. ജലത്തിന്റെ ഓർമ്മകൾ

---

മിന്നൽ. വിദൂരമായൊരു നിബിഡവനത്തിൽ തോരാമഴ.
മദ്ധ്യാഹ്നം: തുളുമ്പുന്ന തടാകം; അതിനു മേൽ കുനിഞ്ഞിറങ്ങുന്ന മാങ്കൊമ്പ്.
തെന്നൽ: ജനാലയിൽ ചാരിനിന്നു തുടക്കമിടുന്ന മഴ.
രാത്രി: മിനുങ്ങുന്ന പൂഴി; പൊടുന്നനേ കാഴ്ചയിലേക്കു വരുന്ന പുഴ.

മനസ്സിനു ജലത്തിന്റെ ഓർമ്മകളനേകം.

---

4. വസന്തം

---

അതേ ആദർശഋതു.
മനസ്സിലെന്തോ ഉടയുന്നു.
അനുഭവമെന്നോടു പറയുന്നു:
ഇതു കാലം വസന്തം.

---

5. ഏകാന്തത

---

മോഹൻ രോഗിയായി.
കമല കരുതി
അയാൾ ലോകമാകെ വെടിഞ്ഞ്
തന്റെയരികിലേക്കെത്തിയതാണെന്ന്.
രണ്ടുനാളങ്ങനെ പോയി.
പിന്നെ മോഹനെങ്ങോ പോയി,
തന്റെ രോഗത്തിന്റെ ഏകാന്തതയുമായി.
കമല പിന്നെയുമേകാകിനിയായി, കമല.

---

6. ജീവിക്കാൻ പഠിച്ചവർ

---

ഒരിക്കൽ ഞാൻ വീട്ടിലേക്കു നടക്കുമ്പോൾ
കൈയിലൊരു പുസ്തകമുണ്ടായിരുന്നു,
ഒരു കോളിഫ്ളവറും.
ആഹാ! എന്തുമാതിരി കവിത!
ഇക്കാലത്തു പുസ്തകങ്ങൾ കോളിഫ്ളവറു പോലെ മൃദുലം,
കോളിഫ്ളവർ പുസ്തകം പോലെ വിരസവും.
അതിനാൽ ഞാനൊരു സുന്ദരിയോടോടിച്ചെന്നു പറഞ്ഞു:
നോക്കൂ, ഇതു രണ്ടും വച്ചുമാറിക്കൂടേ?
അവൾക്കതു പിടികിട്ടിയില്ല.
ആളുകൾ ജീവിക്കാൻ പഠിച്ചവരായിരിക്കുന്നുവെന്നേ.
ആരുമിപ്പോൾ അസംബന്ധങ്ങൾ പറയാറില്ല.
നേട്ടക്കാരുടെ ലോകത്തു നേരമ്പോക്കിനു സ്ഥാനവുമില്ല.
കച്ചവടത്തിന്റെ ചിട്ടവട്ടത്തിൽ
ഓരോന്നും അതാതിടത്തിരിക്കണം.
കോളിഫ്ളവർ വായിച്ചിട്ടോ
പുസ്തകം തിന്നിട്ടോ എന്തു കിട്ടാൻ!

---

http://en.wikipedia.org/wiki/Raghuvir_Sahay

---