ഹൃദയാകൃതിയിൽ ഇലകളുള്ള ചെടി
ഊഷ്മളമായ വേനൽമഴ.
ഒരു കനത്ത തുള്ളി വീഴുമ്പോൾ
ഇലയാകെ വിറക്കൊള്ളുന്നു.
എന്റെ ഹൃദയവുമതുപോലെ വിറക്കൊള്ളുന്നു
ഓരോ നേരവും നിന്റെ പേരതിൽ വന്നുവീഴുമ്പോൾ.
എന്നാൽ
ആദ്യം ഞാൻ സ്നേഹിച്ചത്
നിന്റെ കണ്ണുകളിലെ തിളക്കത്തെ
നിന്റെ ചിരിയെ
നിന്റെ ജീവിതാനന്ദത്തെ
ഇന്നു ഞാൻ നിന്റെ തേങ്ങലിനെയും സ്നേഹിക്കുന്നു
നിന്റെ ജീവിതഭയത്തെയും
നിന്റെ കണ്ണുകളിലെ നിസ്സഹായതയെയും
എന്നാൽ നിന്റെ ഭയമകറ്റാൻ
ഞാൻ സഹായിക്കാം
എന്തെന്നാൽ
എന്റെ ജീവിതാനന്ദമെന്നാൽ
നിന്റെ കണ്ണുകളിലെ തിളക്കം തന്നെയിന്നും.
ചോദ്യങ്ങളും ഉത്തരങ്ങളും
എവിടെയാണതിന്റെ താമസം?
നൈരാശ്യത്തിന്റെ തൊട്ടടുത്ത വീട്ടിൽത്തന്നെ.
ആരൊക്കെയാണതിന്റെ ബന്ധുക്കൾ?
മരണവും ഭീതിയും.
പോകേണ്ടിവരുമെന്നാവുമ്പോൾ
എവിടെയ്ക്കാണതു പോവുക?
ആർക്കുമതറിയില്ല.
എവിടെ നിന്നാണതു വരുന്നത്?
തൊട്ടരികിൽ നിന്ന്, വളരെയകലെ നിന്നും.
എത്ര നാളതൊപ്പമുണ്ടാവും?
ഭാഗ്യമുണ്ടെങ്കിൽ
നിങ്ങളുടെ ആയുസ്സൊടുങ്ങുവോളം.
നിങ്ങളിൽ നിന്നതെന്താണാവശ്യപ്പെടുന്നത്?
അതിനൊന്നും വേണ്ട, അല്ലെങ്കിൽ എല്ലാം വേണം.
അതുകൊണ്ടെന്താണർത്ഥമാക്കുന്നത്?
രണ്ടായാലുമൊന്നുതന്നെയെന്ന്.
പകരമതെന്തു തരുന്നു,
നിങ്ങൾക്ക്-അല്ലെങ്കിൽ എനിക്ക്?
അതു നമ്മിൽ നിന്നെടുത്തതു കൃത്യമായി.
അതിനായതിനൊന്നും വേണ്ട.
അതു നിങ്ങളെ-
അല്ലെങ്കിൽ എന്നെ-
തടവുകാരനാക്കുകയാണോ,
അതോ നമ്മെ സ്വതന്ത്രരാക്കുകയോ?
അതു നമ്മെ സ്വതന്ത്രരാക്കി
എന്നു വന്നേക്കാം.
അതുമായി നമുക്കൊരിടപാടുമില്ലെന്നു വന്നാൽ,
അതു നല്ലതോ ചീത്തയോ?
അതിലും വലിയൊരു ദുര്യോഗം
നമുക്കു വരാനില്ല തന്നെ.
ശരിക്കുമതെന്താണ്‌,
എങ്ങനെ നാമതിനെ നിർവചിക്കാൻ?
താനതാണെന്നു ദൈവം പറഞ്ഞതായി
പറഞ്ഞുകേൾക്കുന്നു.
സംശയവും ഉത്കണ്ഠയും
തനിയ്ക്കുത്ക്കണ്ഠയുണ്ടെന്ന്
ഒരാൾ പറഞ്ഞാൽ
അയാളെ
സംശയിക്കരുത്
അതേ സമയം
തനിയ്ക്കൊരു സംശയവുമില്ലെന്ന്
ഒരാൾ പറഞ്ഞാൽ
അയാളെക്കുറിച്ചുത്ക്കണ്ഠ വേണം.
എറിക്ക് ഫ്രീഡ് (1921-1988) - ഓസ്ട്രിയയിലെ വിയന്നയിൽ ജനിച്ച ജർമ്മൻ എഴുത്തുകാരൻ. 1938ൽ നാസികൾ രാജ്യമാക്രമിച്ചപ്പോൾ ഇംഗ്ളണ്ടിലേക്കു പലായനം ചെയ്തു. ബി.ബി.സിയിലെ ജർമ്മൻ വിഭാഗത്തിൽ ജോലി ചെയ്തു. ഷേക്സ്പിയർ, റ്റി.എസ്.എലിയട്ട്, ഡൈലൻ തോമസ് തുടങ്ങിയവരുടെ കൃതിക്ൾ ജർമ്മനിലേക്കു വിവർത്തനം ചെയ്തു. ആദ്യകാലത്തെ രാഷ്ട്രീയകവിതകളും പിൽക്കാലത്തെ പ്രണയകവിതകളും പ്രശസ്തമായി.
No comments:
Post a Comment