സ്ത്രീകളെഴുതിയ കവിതകൾ
ലോകത്തിനു കണ്ണുകളത്രയധികമായിരിക്കെ
നിന്നെയാശിച്ചുരുകാനേ എനിക്കാവൂ,
നടക്കല്ലു പോലരികത്താണു നീയെങ്കിലും.
-മന്യോഷു
പോയ രാത്രിയിൽ
ഞാനൊരുടവാൾ സ്വപ്നം കണ്ടു;
നാമൊരുമിക്കുമെന്നോ,
അതിനർത്ഥം?
-മന്യോഷു
ഞാൻ നിന്നെയോർത്തിരിക്കാം,
നീ എന്നെ മറക്കുകയുമരുത്.
കടലോരത്തു കാറ്റു വീശുമ്പോലെ
അതു നിലയ്ക്കാതെയുമിരിക്കട്ടെ.
-മന്യോഷു
രണ്ടു തോണികളിലാണു
നമുക്കു യാത്രയെന്നറിയുമ്പോൾ
കണ്ണീരും തിരകളുമെന്നെ നനയ്ക്കുന്നു.
-ഇസുമി ഷികിബു
ഒരു മഞ്ഞുതുള്ളി പോലെ മാഞ്ഞുപോകാൻ
നിങ്ങളെന്നെ വിട്ടിരുന്നുവെങ്കിൽ;
പകരം നിങ്ങളെന്നെ ഒരു രത്നമാക്കി,
ആർക്കുമുപകരിക്കാതെ.
-ഇസുമി ഷികിബു
തെളിഞ്ഞ ചന്ദ്രനെയാവാം
അന്യരീ രാത്രിയിൽ കാണുക;
എന്റെ കണ്ണുകൾക്കതു നിഴലടഞ്ഞതും
കണ്ണീരു കൊണ്ടു മറഞ്ഞതും.
-ഇസുമി ഷികിബു
എന്താണു ശോകം?
സ്വപ്നം
മാത്രമായ ജീവിതം.
-ഇസുമി ഷികിബു
2 comments:
മനോഹരം
എന്തിനാണ് കൂടുതല്‍ വരികള്‍......
Post a Comment