റോബർട്ട് ഗ്രേവ്സ് - പ്രണയത്തിന്റെ രോഗലക്ഷണങ്ങൾ

---

പരക്കെക്കാണുന്നൊരു ചെന്നിക്കുത്താണു പ്രണയം,
കാഴ്ചയ്ക്കൊരു മങ്ങൽ പറ്റിയപോലെ,
ചിന്തയ്ക്കൊരു യുക്തിക്കുറവു പോലെ.
യഥാർത്ഥപ്രണയത്തിന്റെ ലക്ഷണങ്ങളത്രെ,
മെലിച്ചിൽ, അസൂയ,
ചുണ കെട്ട പ്രഭാതങ്ങൾ;
ശകുനങ്ങളും ദുഃസ്വപ്നങ്ങളും വേറെയുണ്ട്-
കതകിലാരോ മുട്ടുന്നതു കേൾക്കുക,
ഒരടയാളത്തിനായി കാത്തിരിക്കുക:
ഇരുളടഞ്ഞ മുറിയിൽ
അവളുടെ ഒരു വിരൽസ്പർശത്തിനായി,
ആരായുന്നൊരു നോട്ടത്തിനായി.
ധൈര്യമായിരിക്കൂ, കാമുകാ!
ഇത്രയും വേദന താൻ സഹിക്കുമോ,
മറ്റൊരുവളാണതിനു കാരണമായതെങ്കിൽ?

---