സ്ബിഗ്നിയെവ്‌ ഹെര്‍ബെര്‍ട്ട് - വീണ്ടെടുപ്പിനെ സംബന്ധിച്ച് ശ്രീമാൻ കോജിറ്റോവിന്റെ വിചാരങ്ങൾ

---

അവൻ പുത്രനെ അയക്കരുതായിരുന്നു

എത്രയധികം പേർ കണ്ടിരിക്കുന്നു
അവന്റെ പുത്രന്റെ തുളഞ്ഞ കൈകൾ
അവന്റെ അനുദിനചർമ്മവും

എത്രയും മോശമായ പരിഹാരക്രിയയാൽ
നമ്മുടെ പാപപരിഹാരത്തിനെന്നത്രേ
എഴുതപ്പെട്ടിരിക്കുന്നു

അത്രയധികം നാസാദ്വാരങ്ങൾ
ആസ്വദിച്ചുൾക്കൊണ്ടിരിക്കുന്നു
അവന്റെ ഭീതിയുടെ ഗന്ധം

അത്രയ്ക്കു താഴരുതാരും
അത്ര സംസർഗ്ഗമരുത്
ചോരയുമായി

അവൻ പുത്രനെ അയക്കരുതായിരുന്നു
വെണ്ണക്കൽമേഘങ്ങളുടെ ബറോക്ക്കൊട്ടാരത്തിൽ
ഭീതിയുടെ സിംഹാസനത്തിൽ
മരണത്തിന്റെ ചെങ്കോലും പിടിച്ചു വാഴുക
അതിലും ഭേദം

---

ബറോക്ക്- അമിതാലങ്കാരത്തിനു പ്രാധാന്യം നല്‍കിയിരുന്ന യൂറോപ്യന്‍ കലാസമ്പ്രദായം

---

ചിത്രം- ചിന്താവിഷ്ടനായ ക്രിസ്തു

---