അക്കെദായിലെ യഥാർത്ഥനായകൻ മുട്ടനാടായിരുന്നു,
അന്യരുടെ ഒത്തുകളി അവൻ കാണാതെപോയി.
ഇസ്ഹാക്കിന്റെ സ്ഥാനമേറ്റെടുക്കാൻ
സ്വയമവൻ മുന്നോട്ടുവന്നതു പോലെയായിരുന്നു.
ഞാനൊരു സ്തുതി പാടട്ടെ,
അവന്റെ ഓർമ്മയ്ക്ക്,
അവന്റെ ചുരുളൻ കമ്പിളിയ്ക്കും മനുഷ്യക്കണ്ണുകൾക്കും,
അഴകുള്ള തലയ്ക്കു മേൽ
അത്രയും മൗനം പൂണ്ടുകിടന്ന കൊമ്പുകൾക്ക്;
ആ കൊമ്പുകൾ തന്നെ
കശാപ്പിനു ശേഷം കാഹളങ്ങളായത്,
അവരുടെ യുദ്ധങ്ങളിൽ മുഴങ്ങാൻ,
അവരുടെ ആഭാസക്കൂത്തുൾക്കു കുഴലൂതാൻ.
അവസാനരംഗം ഞാനൊന്നു മനസ്സിൽ കാണട്ടെ,
വിശിഷ്ടമായൊരു ഫാഷൻ മാസികയിലെ
സുന്ദരമായ ഫോട്ടോ പോലെ:
സുന്ദരവേഷത്തിൽ, ഇരുനിറത്തിൽ,
കൊഞ്ചിച്ചുവളർത്തിയ പയ്യൻ,
അവനു തൊട്ടടുത്ത് നീളൻ പട്ടുകുപ്പായവുമിട്ട്
വിരുന്നിനെത്തിയ പോലെ മാലാഖ,
രണ്ടുപേരുടെയും ശൂന്യമായ ദൃഷ്ടികൾ
ശൂന്യമായ രണ്ടിടങ്ങളിൽ തറഞ്ഞിരിക്കുന്നു.
അവർക്കു പിന്നിലായി,
വർണ്ണാഭമായൊരു പശ്ചാത്തലം പോലെ,
കശാപ്പിനു മുമ്പ് കുറ്റിക്കാട്ടിൽ കുരുങ്ങിക്കിടക്കുന്ന മുട്ടനാട്.
അവന്റെ അവസാനത്തെ ചങ്ങാതി ആ കുറ്റിക്കാട്.
മാലാഖ സ്വർഗ്ഗത്തേക്കു പോയി.
ഇസ്ഹാക്കു വീട്ടിലേക്കു പോയി.
അബ്രഹാമും ദൈവവും പണ്ടേ സ്ഥലം വിട്ടു.
അക്കെദായിലെ യഥാർത്ഥനായകൻ
മുട്ടനാടു തന്നെ.
(അക്കെദാ- അബ്രഹാമിന്റെ പുത്രബലി)
No comments:
Post a Comment