അഭിമാനിയായ ഒരു പിശക്
ഒരിക്കൽ ഒരിടത്ത് ഒരു പിശകുണ്ടായിരുന്നു
അത്ര നിസ്സാരം അത്ര ചെറുതും
ആരുടെയും ശ്രദ്ധയിൽപ്പെടുക പോലുമില്ലത്
താൻ കാഴ്ചയിൽ വരുന്നതും കാതില്പ്പെടുന്നതും
അതിനു സഹിച്ചില്ല
പലേ ഉപായങ്ങളും അതു കണ്ടുപിടിച്ചു
താനെന്നൊന്നില്ലെന്നു
തെളിയിക്കാൻ മാത്രമായി
അതു സ്ഥലം കണ്ടുപിടിച്ചു
തന്റെ തെളിവുകൾ എടുത്തുവയ്ക്കാനായി
അതു കാലം കണ്ടുപിടിച്ചു
തന്റെ തെളിവുകൾ ഇട്ടുവയ്ക്കാനായി
തന്റെ തെളിവുകൾ കാണാനായി ലോകവും
അതു കണ്ടുപിടിച്ചതൊന്നും
അത്ര നിസ്സാരമായിരുന്നില്ല
ചെറുതുമായിരുന്നില്ല
ഒക്കെപ്പക്ഷേ പിശകുമായിരുന്നു
മറ്റൊരു വിധമായിരുന്നെങ്കിൽ
കളി കഴിഞ്ഞിട്ട്
ഒടുവിൽ കൈകൾ വയറ്റിലള്ളിപ്പിടിയ്ക്കുന്നു
ചിരിച്ചു വശംകെട്ടു വയറു പൊട്ടിപ്പോയാലോ
പക്ഷേ വയറു കാണാനില്ല
ഒരു കൈ എങ്ങനെയോ തനിയേ പൊങ്ങുന്നു
നെറ്റിയിലെ വിയർപ്പു തുടയ്ക്കാനായി
നെറ്റിയും കാണാനില്ല
മറ്റേ കൈ നെഞ്ചത്തടുക്കിപ്പിടിയ്ക്കുന്നു
ഹൃദയം നെഞ്ചിനുള്ളിൽ നിന്നു പുറത്തു ചാടിയാലോ
ഹൃദയവും കാണാനില്ല
രണ്ടു കൈകളും താഴുന്നു
മടിയിലേക്കു കുഴഞ്ഞുവീഴുന്നു
മടിയും കാണാനില്ല
ഒരു കൈയിൽ നിന്നിതാ മഴ പെയ്യുന്നു
മറ്റേതിൽ നിന്നു പുല്ലു പൊടിയ്ക്കുന്നു
ഇതിലധികം ഞാനെന്തു പറയാൻ
No comments:
Post a Comment