വാസ്കോ പോപ്പ-ഉള്ളിന്റെയുള്ളിൽ-1

---

നാം കൈകളുയർത്തുന്നു
തെരുവാകാശത്തേക്കു പിടിച്ചുകയറുന്നു
നാം കണ്ണു താഴ്ത്തുന്നു
പുരപ്പുറങ്ങൾ നിലം പൊത്തുന്നു

നാം പുറത്തു പറയാത്ത
ഓരോ വേദനയിൽ നിന്നും
ഒരു മരം മുളയെടുക്കുന്നു
നമുക്കു പിന്നിലതു
ദുരൂഹമായി നിലകൊള്ളുന്നു

നാം താലോലിയ്ക്കുന്ന
ഓരോ പ്രത്യാശയിൽ നിന്നും
ഒരു നക്ഷത്രം പിറവിയെടുക്കുന്നു
നമുക്കു പിടിതരാതെ
അതു മുന്നിൽ നീങ്ങുന്നു

നമ്മുടെ തലയ്ക്കു മുകളിലൂടെ
ഒരു വെടിയുണ്ട മൂളിപ്പറക്കുന്നതു നീ കേട്ടുവോ
നമ്മുടെ ചുംബനത്തിനു മേൽ ചാടിവീഴാൻ
ഒരു വെടിയുണ്ട പതിയിരിക്കുന്നതു നീ കേൾക്കുന്നുവോ

---