വാസ്കോ പോപ്പ-വീടില്ലാത്ത തല

അറ്റുപോയൊരു തല
പല്ലുകൾക്കിടയിൽ കടിച്ചുപിടിച്ച പൂവുമായൊരു തല
അതു ഭൂമിയെ വലംവയ്ച്ചലയുന്നു

എതിരെ സൂര്യൻ വരുന്നു
അതു തല കുനിച്ചു വണങ്ങുന്നു
എന്നിട്ടു തന്റെ വഴിയ്ക്കു പോകുന്നു

എതിരെ ചന്ദ്രൻ വരുന്നു
അതൊന്നു പുഞ്ചിരിയിടുന്നു
എന്നിട്ടതു നില്ക്കുന്നില്ല

എന്തിനാണതു ഭൂമിയെ നോക്കി അമറുന്നത്
മടങ്ങാനതിനാവില്ലേ
അല്ലെങ്കിൽ വിട്ടുപോകാൻ

പൂത്ത ചുണ്ടുകൾക്കേ കാര്യമറിയൂ എന്നുവരാം

---