പ്രത്യാശ നിങ്ങൾക്കുണ്ട്, മണ്ണു വെറും സ്വപ്നമല്ല,
ജീവനുള്ള ഉടലാണെന്നു നിങ്ങൾക്കു വിശ്വാസമുണ്ടെങ്കിൽ.
കാഴ്ചയും, സ്പർശവും, കേൾവിയും നുണ പറയുകയല്ലെന്ന്,
അടച്ച പടിയ്ക്കു പുറത്തു നിന്നു കാണുന്നൊരുദ്യാനം പോലെയാണ്‌
ഇവിടെക്കണ്ടതൊക്കെയുമെന്നു നിങ്ങൾക്കു വിശ്വാസമായെങ്കിൽ.
ഉള്ളിൽക്കടക്കാനാവില്ലെങ്കിലും അതുണ്ടെന്നതു തീർച്ച.
ഒന്നുകൂടി വ്യക്തമായും ബുദ്ധിപരമായും നോക്കാൻ നമുക്കായാൽ
ഉദ്യാനത്തിലൊരിടത്തൊരുപക്ഷേ നാം കണ്ടെടുത്തുവെന്നുമാകാം,
നമുക്കപരിചിതമായൊരു പുഷ്പത്തെ, പേരു വീഴാത്തൊരു നക്ഷത്രത്തെ.
ചിലർ പറയുന്നു, കണ്ണുകളെ നാം വിശ്വാസത്തിലെടുക്കരുതെന്ന്,
യാതൊന്നുമില്ല, വെറുമൊരു തോന്നലേയുള്ളുവെന്ന്,
പ്രത്യാശ നശിച്ച കൂട്ടരാണവർ.
അവർ കരുതുന്നു, നാം പുറം തിരിയേണ്ട താമസം,
ലോകം നമുക്കു പിന്നിൽ നിലച്ചുപോകുമെന്ന്,
കള്ളന്മാരുടെ കൈകൾ തട്ടിപ്പറിച്ചാലെന്നപോലെ.
link to image
No comments:
Post a Comment