മിഗ്വെൽ ഹെർണാണ്ടെഥ് - മൂന്നു മുറിവുകളുമായി അവൻ വന്നു

---

മൂന്നു മുറിവുകളുമായി അവൻ വന്നു

---

മൂന്നു മുറിവുകളുമായി അവൻ വന്നു:
ഒന്നു പ്രണയത്തിന്റെ,
ഒന്നു മരണത്തിന്റെ,
ഒന്നു ജീവിതത്തിന്റെ.

മൂന്നു മുറിവുകളുമായി അവൻ വരുന്നു:
ഒന്നു ജീവിതത്തിന്റെ,
ഒന്നു പ്രണയത്തിന്റെ,
ഒന്നു മരണത്തിന്റെ.

മൂന്നു മുറിവുകളുമായി ഞാനിരിക്കുന്നു:
ഒന്നു ജീവിതത്തിന്റെ,
ഒന്നു മരണത്തിന്റെ,
ഒന്നു പ്രണയത്തിന്റെ.

(1942)

---

നീയെന്നിൽ മരിക്കുന്നു...

---

നീയെന്നിൽ മരിക്കുന്നു, അത്രയും നൈർമ്മല്യവും സാരള്യവുമായി,
അപരാധി ഞാൻ പ്രിയേ, അതിനു പഴി എനിക്കിരിക്കട്ടെ,
ചുംബനങ്ങൾ മോഷ്ടിക്കുക ശീലമാക്കിയവൻ,
നിന്റെ കവിളത്തെപ്പൂവിൽ നിന്നു മൊത്തിയല്ലോ ഞാൻ.

നിന്റെ കവിളത്തെപ്പൂവിൽ നിന്നു മൊത്തിയല്ലോ ഞാൻ,
ആ മഹിമയിൽപ്പിന്നെ, ആ അപരാധത്തിൽപ്പിന്നെ,
അത്രയും ശ്രദ്ധയോടെ നീ പരിപാലിച്ച നിന്റെ കവിൾ,
അതു കുഴിഞ്ഞു, അതു ദുഷിച്ചു, അതു വിളർത്തു.

ഇന്നും നിന്റെ കവിളിനെ വിടാതെ പിന്തുടരുന്നു
ആ അപരാധിചുംബനത്തിന്റെ പ്രേതം,
പ്രകടമായി, കറുത്തതായി, കൂറ്റനായി.

നിനക്കുറക്കവും നഷ്ടമായി പ്രിയേ,
എന്റെ ചുണ്ടുകളെ തടുക്കാൻ ജാഗ്രതയോടിരിക്കെ,
അതു കുറുമ്പു കാട്ടാതെ കാവലിരിക്കെ.

(1936)

---

link to Miguel Hernandez

---