സായാഹ്നം സാവധാനമെടുത്തുടുക്കുന്നു,
പ്രാക്തനവൃക്ഷനിരകളെടുത്തുനീട്ടുന്ന നീലമേലാട;
നോക്കിനിൽക്കവേ രണ്ടു ലോകങ്ങൾ നിങ്ങളിൽ നിന്നകലുന്നു:
ഒന്നു മാനം നോക്കിയുയരുന്നു, മറ്റൊന്നു താഴുന്നു.
നിങ്ങൾ ശേഷിക്കുന്നു, രണ്ടിലൊന്നിന്റെയും ഭാഗമാവാതെ,
മൗനത്തിലായ വീടുകൾ പോലെ നിഴലടഞ്ഞതാവാതെ,
രാത്രികളിൽ നക്ഷത്രമായാരോഹണം ചെയ്യുന്നതൊന്നിനെപ്പോലെ
നിത്യതയെ ആവാഹനം ചെയ്യാനുള്ള തീർച്ചയില്ലാതെ.
നിങ്ങൾ ശേഷിക്കുന്നു (ഇഴ വേർപെടുത്താനാവാതെ)
വിപുലവും കാതരവുമായ നിങ്ങളുടെ ജീവിതവുമായി;
ചിലനേരം പരിമിതമായി, ചിലനേരം വ്യാപകമായി,
ഊഴമിട്ടതു നിങ്ങളിൽ വളരുന്നു, ശിലയായി, നക്ഷത്രമായി.
ചിത്രം - വാൻ ഗോഗ് - നക്ഷത്രങ്ങൾ നിറഞ്ഞ ആകാശം
No comments:
Post a Comment