ഫ്രാങ്കോ ഫോർട്ടിനി - കഠിനഹേമന്തം

---

കഠിനഹേമന്തമേ, നിന്റെ അഗ്നി വെടിച്ചുകത്തുന്നു,
ഹേമന്തമേ, നീ കാടുകളും കൂരകളുമകത്താക്കുന്നു
ഹേമന്തമേ, നീ വെട്ടിത്തീയിടുന്നു.

കരയുന്നവൻ കരഞ്ഞുകൊണ്ടിരിക്കട്ടെ,
യാതനപ്പെടുന്നവൻ പിന്നെയും യാതനപ്പെടട്ടെ,
വെറുക്കുന്നവൻ പിന്നെയും വെറുക്കട്ടെ;
ചതിക്കുന്നവൻ, അവൻ വിജയിക്കട്ടെ:
ഇതത്രേ, നമ്മുടെ ഹേമന്തത്തിന്റെ
ആത്യന്തികപാഠവും ശാസനവും.

നമുക്കറിയുമായിരുന്നില്ല,
ജീവിതത്തിന്റെ പച്ചപ്പും
പൂക്കളുടെ ചന്തവും കൊണ്ടെന്തു ചെയ്യണമെന്ന്.
അതിനാൽത്തന്നെ, നമ്മുടെ ഹൃദയങ്ങളുടെ കടയ്ക്കൽ
മഴു വീണിരിക്കുന്നതും.

പിടയുന്ന കൊള്ളികൾ പോലെ നാമെരിയും.

---

ഫ്രാങ്കോ ഫോർട്ടിനി (1917-1993) - ജൂതനായ പിതാവിന്റെയും കൃസ്ത്യാനിയായ അമ്മയുടെയും മകനായി ഇറ്റലിയിലെ ഫ്ളോറൻസിൽ ജനിച്ചു. ഫ്രാങ്കോ ലാറ്റെ എന്നാണു ശരിക്കുള്ള പേരെങ്കിലും 1938 -ലെ വംശീയവിവേചനനിയമത്തിൽ നിന്നു രക്ഷപ്പെടാനായി അമ്മയുടെ കുടുംബപ്പേരു സ്വീകരിക്കുകയായിരുന്നു.

---