ഉള്ളംകൈയിലൊരു കിളിയുടെ കരൾത്തുടിപ്പു പോലെ,
നിന്റെ പേരതുപോലെ-
നാവിൻതുമ്പത്തലിയുന്ന മഞ്ഞലകു പോലെ,
നിന്റെ പേരതുപോലെ-
ചുണ്ടുകളൊന്നു വിടരുകയേ വേണ്ടു
നിന്റെ പേരിന്നഞ്ചക്ഷരങ്ങളുച്ചരിക്കാൻ;
കുതിച്ചുവന്ന പന്തു കൈയിൽക്കിട്ടിയ പോലെ,
നാവിലൊരു മണിനാദത്തിന്റെ കുളിർമ്മ പോലെ..
അലയടങ്ങിയ തടാകത്തിലൊരു കല്ലു വീണപോലെ,
നിന്റെ പേരു വിളിച്ചുകേൾക്കുന്നതതുപോലെ;
നിശബ്ദരാത്രിയിൽ കുതികൊള്ളുന്ന കുളമ്പടികൾ പോലെ,
നിന്റെ പേരിടിമുഴക്കുന്നതതു പോലെ;
നെറ്റിയിലമർത്തിയ തോക്കിന്റെ കാഞ്ചി വലിച്ച ശബ്ദം പോലെ,
നിശിതം, നിന്റെ പേരതുപോലെ: ബ്ളോക്ക്!
എന്റെ കണ്ണിലൊരു ചുംബനം പോലെ,
നിന്റെ പേരതുപോലെ;
അടഞ്ഞ കണ്ണിമകളുടെ കുളിർമ്മ പോലെ,
നിന്റെ പേരതുപോലെ, മഞ്ഞിന്റെ ചുംബനം പോലെ;
ഉറവെള്ളം കോരിയെടുത്ത കുളിർമ്മ പോലെ-
ഉറക്കം ഞാനുണരാതെയുമാവുന്നു,
നിന്റെ പേരുറക്കുപാട്ടാവുമ്പോൾ.
റഷ്യൻ കവിയായ അലക്സാണ്ടർ ബ്ളോക്കിനു സമർപ്പിച്ച കവിത
No comments:
Post a Comment