പുഴകളെ ഞാനറിഞ്ഞിരിക്കുന്നു.
ലോകത്തെപ്പോലെ പുരാതനമായ പുഴകളെ,
മനുഷ്യസിരകളിലൊഴുകുന്ന മനുഷ്യരക്തത്തെക്കാൾ പ്രായമേറിയ
പുഴകളെ ഞാനറിഞ്ഞിരിക്കുന്നു.
പുഴകളെപ്പോലാഴമായിരിക്കുന്നു എന്റെ ആത്മാവിനും.
ഉദയങ്ങൾക്കു ചെറുപ്പമായിരുന്നപ്പോൾ യൂഫ്രട്ടീസിൽ ഞാൻ കുളിച്ചു.
കോംഗോയുടെ കരയിൽ ഞാനെന്റെ കൂര പണിതു,
അതെന്നെ പാടിയുറക്കുകയും ചെയ്തു.
നൈൽ നദിയെ ഞാൻ നോക്കിനിന്നിരുന്നു,
അതിന്റെ കരയിലാണു ഞാൻ പിരമിഡുകൾ പണിതുയർത്തിയതും.
ലിങ്കൺ ന്യൂ ഓർലിയൻസിലേക്കു പോയപ്പോൾ
മിസിസിപ്പി പാടിയ പാട്ടു ഞാൻ കേട്ടിരുന്നു,
അതിന്റെ ചേറു പറ്റിയ മാറിടം
അസ്തമയവേളയിൽ പൊന്മയമാകുന്നതും ഞാൻ കണ്ടു.
പുഴകളെ ഞാനറിഞ്ഞിരിക്കുന്നു:
പ്രാചീനമായ, നിറമിരുണ്ട പുഴകളെ.
പുഴകളെപ്പോലാഴമായിരിക്കുന്നു എന്റെ ആത്മാവിനും.
No comments:
Post a Comment